दमाैली- १८ वर्षभन्दा बढी उमेर पुगेका सबै नागरिकलाई कोरोनाविरुद्धको खोप लगाइने भएको छ। तनहुँका विभिन्न स्थानीय तहले १८ वर्षमाथिका सबै नागरिकलाई कोरोनाविरुद्धको खोप लगाउन लागेको हो। केही स्थानीय तहले पनि खोप अभियान सम्पन्न गरिसकेका छन्।
बन्दीपुर गाउँपालिकाले १८ वर्ष उमेर पूरा भएका सबै नागरिकका लागि मङ्सिर ८ गते कोभिडसिल्ड र एस्ट्राजेनेका खोप लगाउने स्वास्थ्य शाखाप्रमुख अन्जिर भट्टराईले जानकारी दिए।
गाउँपालिका-१ स्थित पिप्ले आधारभूत स्वास्थ्य सेवा केन्द्र र वडा नं ४ स्थित बन्दीपुर अस्पतालबाट खोप अभियान सञ्चालन गर्नेछ। गाउँपालिकाले यसअगाडि लक्षित समूहका नागरिक, ज्येष्ठ नागरिक, विद्यार्थी लगायतलाई खोप लगाइसकेको छ।
देवघाट गाउँपालिकाले मङ्सिर ८ र ९ गते १८ वर्षमाथिका सबै नागरिकलाई खोप लगाउने भएको छ। गाउँपालिकाले वडा नं ५ स्थित देवघाट धर्मार्थ अस्पतालमा खोप अभियान सञ्चालन गर्ने प्रमुख प्रशासकीय अधिकृत रमेश सुवेदीले जानकारी दिए।
कोरोना रोकथाम तथा नियन्त्रण गर्दै सङ्क्रमणको जोखिमबाट नागरिकलाई जोगाउन चरणबद्ध तरिकाले प्राथमिकता र भ्याक्सिन उपलब्धताका आधारमा खोप अभियान सञ्चालन गरिँदै आएको सुवेदीले बताए।
व्यास नगरपालिका, भिमाद नगरपालिका र आँबुखैरेनी गाउँपालिकाले भने १८ वर्षमाथिका सबै नागरिकलाई खोप लगाइसकेको छ। व्यास नगरपालिकाले छुट भएका १८ वर्षमाथिका नागरिकलाई पुनः खोप लगाउने भएको छ। मङ्सिर ८ र ९ गते विभिन्न स्वास्थ्य संस्थामार्फत यसअघि छुट भएका सबैलाई खोप लगाइने स्वास्थ्य शाखाप्रमुख प्रमोद सोतीले जानकारी दिए।
नगरपालिकामा १२ वटा स्वास्थ्य संस्थामार्फत खोप लगाइनेछ। व्यास-१ को चारकुने स्वास्थ्य केन्द्र, व्यास- २ को केराबारी स्वास्थ्य केन्द्र, व्यास-३ को नगरपालिकाको सभाहल, व्यास-४ को वडा कार्यालय, व्यास-५ को पतेनी आधारभूत स्वास्थ्य केन्द्र, व्यास-६ को स्याम्घा स्वास्थ्यचौकी, व्यास-७ को पाथ्रा स्वास्थ्य केन्द्र, व्यास-८ को रिस्ती स्वास्थ्यचौकी, व्यास-९ को गजुरे स्वास्थ्यचौकी, व्यास-१० को कोभिड व्यवस्थापन अस्पताल, व्यास-११ को तनहुँसुर स्वास्थ्यचौकी र व्यास-१२ को घाँसीकुवा स्वास्थ्यचौकीमा खोप अभियान सञ्चालन गरिने भएको छ।
तनहुँका हालसम्म ६५ हजार आठ सय ३८ जनाले खोपको दुवै मात्रा लगाइसकेका छन् भने ८६ हजार दुई सय १६ ले पहिलो मात्रा लगाएका छन्।
स्वास्थ्य कार्यालयका खोप अधिकृत शङ्करबाबु अधिकारीका अनुसार भानुका नौ हजार चार सय ३६, व्यासका १६ हजार सात सय ४६, शुक्लागण्डकीका १० हजार ६१, भिमादका छ हजार पाँच सय २५, म्याग्देका चार हजार छ सय ४५, घिरिङका दुई हजार सात सय ८८, ऋषिङका तीन हजार सात सय २९, देवघाटका तीन हजार पाँच सय ८९, बन्दीपुरका चार हजार ४७ र आँबुखैरेनीका चार हजार दुई सय ७२ ले खोपको दुवै मात्रा लगाएका छन्।
रासस
1621421639-1730352532.jpg)
