काठमाडौं । शिक्षा मन्त्रालयले चिकित्सा शिक्षा आयोगले तोकेको भन्दा बढी शुल्क लिने मेडिकल कलेजलाई कार्वाही हुने बताएको छ ।
मन्त्रालयले एक विज्ञप्ती जारी गर्दै गैर कानूनी रुपमा विद्यार्थीहरुबाट बढी शुल्क असुल गरेमा राष्ट्रिय चिकित्सा शिक्षा ऐन २०७५ को दफा १४ बमोजिम कारबाही हुने बताएको हो । आयोगको निर्देशन तथा चिकित्सा शिक्षा ऐनलाई वेवास्ता गरी बढी शुल्क लिएमा आयोगले बढी शुल्क लिने मेडिकल कलेजहरुको सम्बन्ध तथा शैक्षिक कार्यक्रम खारेज समेत गर्नसक्ने ऐनमा उल्लेख छ।
उक्त ऐनको दफ १४ मा ‘सम्बन्धनको खारेजी सम्बन्धि व्यवस्था’ छ। जसमा ‘दफा १८ बमोजिम निर्धारित भन्दा बढी शुल्क लिएमा आयोगले शिक्षण संस्थाको वा सो संस्थाको कुनै एक वा सो भन्दा बढी शैक्षिक कार्यक्रमको सम्बन्धन खारेज गर्न सम्बन्धित विश्वविद्यालयलाई लेखी पठाउन सक्नेछ’ भनिएको छ।
सो ऐनको दफा १८ मा शिक्षण शुल्क सम्बन्धी व्यवस्था उल्लेख गरिएको छ। जसमा ‘विश्वविद्यालय, प्रतिष्ठान वा शिक्षण संस्थाको लागत तथा संचालन खर्च, मुद्रास्फिति, भौगोलिक अवस्थिति, छात्रवृत्ति तथा निशुल्क सेवा समेतलाई दृष्टिगत गरी विश्वविद्यालय, प्रतिष्ठान तथा शिक्षण संस्थासँग परामर्श गरी आयोगले शुल्क निर्धारण गर्नेछ’ भनिएको छ।
तर चिकित्सा शिक्षा आयोगले निर्धारण गरेको शुल्क भन्दा बढी शुल्क माग गर्दै काठमाडौं मेडिकल कलेजले अहिलेसम्म विद्यार्थी भर्ना लिन मानेको छैन। बढी शुल्क माग गर्दै भर्ना नलिएपछि विद्यार्थीहरु लामो समयदेखि सडकमा रिले अनसन तथा धर्नामा छन्।
विद्यार्थीहरुको आन्दोलन चर्किर्दै गएपछि शिक्षा मन्त्रालयले बुधबार विज्ञप्ती जारी गर्दै बढी शुल्क नलिन विश्वविद्यालयहरुलाई जानकारी गराएको र निर्धारित शुल्क भन्दा बढी रकम नबुझाउन सबैलाई सूचना जारी गरिएको जनाएको छ।
शिक्षा मन्त्रालयले केही मेडिकल कलेजहरुले आयोगबाट निर्धारित शुल्क भन्दा बढी शुल्क लिएको जनगुनासो प्रति मन्त्रालयको गम्भिर ध्यानाकर्षण भएको जनाएको छ।
1621421639-1730352532.jpg)
