काठमाडौं । कञ्चनपुरको सदरमुकाम महेन्द्रनगरस्थित सालघारी क्षेत्रमा हजार जना क्षमताको होल्डिङ सेन्टर निर्माणको कार्य अन्तिम चरणमा पुगेको छ।
गत वैशाख महिनामा नेपाल सरकारको मन्त्रिपरिषद् बैठकको निर्णयबमोजिम नेपाली सेनाले निर्माण गर्ने भनिएको सालधारी क्षेत्रमा एक हजार जना क्षमताको होल्डिङ सेन्टर निर्माण कार्य अन्तिम चरणमा पुगेको हो । नेपाली सेनामार्फत् होल्डिङ सेन्टर निर्माणको ठेक्का पाएको हनुमान कन्ट्रक्सन प्रालिले सेन्टरको निमार्णको कार्य अन्तिम चरणमा पुगेको जनाएको छ ।
कम्पनीका अनुसार हाल बेड फिटिङको कार्य चलिरहेको छ । कम्पनीले विद्युत होल्डिङ सेन्टरमा विद्युत आपूर्तिका लागि ट्रान्समिटर राख्ने काम पनि सम्पन्न गरेको छ । होल्डिङ सेन्टरको नब्बे प्रतिशतभन्दा बढी प्रगति भएको छ।
सेनाको श्री नम्बर २५ बाहिरी अड्डा भगतपुर ब्यारेकले होल्डिङ सेन्टरको निमार्णको कार्य हेरिरहेको छ। बाहिनीले निर्माण कार्यको अनुगमन तथा सुपरीवेक्षण गर्ने गरेको छ । निमार्णको कार्य ढिलासुस्ती अथवा निर्माणको कुरामा सेनाले विशेष ध्यान दिएर निर्माण कार्यलाई सहजता गर्ने गरेको बाहिनीले जनाएको छ।
२९ करोडमा होल्डिङ सेन्टरको ठेक्का पाएको निर्माण कम्पनीले करिब साढे पन्ध्र करोड रुपैयाँ भुक्तानी लिएको अवस्था छ। तीन बिगाहा क्षेत्रफलमा निर्माण गरिएको स्थायी होल्डिङ सेन्टरको २२ वटा अलगअलग ब्लक छन् ।
निर्माण भएका सबै ब्लकमा बाथरुम, भान्सा, डाइनिङ रुमलगायतको महत्वपूर्ण सेवासुविधासहित होल्डिङ सेन्टर निर्माण भएको छ।संरचनागत भवन सबै निर्माण भएको र खाली फिटिङको काममात्रै बाँकी रहेको छ । पुस मसान्तसम्म निर्माणको काम सम्पन्न गर्नुपर्ने होल्डिङ सेन्टरको भुक्तानीका कारण ढिलाइ भएको ठेकेदार कम्पनीले जनाएको छ।
कोरोना महामारीको तेस्रो लहरलाई लक्षित गर्दै निर्माण सुरु गरिएको होल्डिङ सेन्टर अबको केही समयभित्रै सेन्टरको निर्माण कार्य सम्पन्न गर्नेसमेत ठेकेदार कम्पनीले जनाएको छ ।
नेपाल सरकारले भारतबाट भित्रिएका नेपाली नागरिकहरूलाई कोरोना संक्रमण भए–नभएको परीक्षण गरेरमात्रै गन्तव्यमा जान दिने वा अस्पतालरआइसोलेसनमा पठाउने गरी वैशाख महिनाको मन्त्रिपरिषद् निमार्णले नेपाल–भारत सीमानाका नजिकै आठ र उपत्यकामा दुई गरी १० ठाउँमा प्रत्येकमा हजार जना मानिस अट्ने क्षमताका होल्डिङ सेन्टर बनाउने निर्णय गरेको थियो । यस्तै होल्डिङ सेन्टरको निर्माण कार्य अन्तिम चरणमा भए पनि यसलाई कसले कसरी सञ्चालन र व्यवस्थापन गर्ने भन्ने विषयमा भने अन्योलता रहेको छ । होल्डिङ सेन्टरको तीन सय बेड तयारी अवस्थामा छन्।
जिल्लाभर अहिले कोरोना सङ्क्रमण दर बढिरहेको छ। जिल्लाको एकमात्र महाकाली अस्पतालमा दिनानुदिन सङ्क्रमितहरू बढिरहेको अवस्था छ । भारतसँग खुला सिमाना भएको जिल्ला प्रत्येक दिन सयौँको सङ्ख्यामा नेपाली स्वदेश फर्कने क्रम पनि बढ्दै गएको छ।
निर्माणको चरणमा रहेको होल्डिङ सेन्टरलाई सेनाको श्री नम्बर २५ बाहिरी अड्डा भगतपुर ब्यारेकले हेरिरहेको छ । तर सम्पन्न होल्डिङ सेन्टर सम्पन्न पछाडि पनि नेपाली सेनाले या कसले कसरी सञ्चालन गर्ने विषय भने स्पष्ट रूपमा तय नहुँदा सञ्चालनमा अन्योलता छाएको छ । यता जिल्ला प्रशासन कार्यालयले भने नेपाल सरकारको माघ २ गतेको निर्णयअनुसार सञ्चालन गर्ने जनाएको छ।
होल्डिङ सेन्टर निर्माणपछि भने जिल्लामा बढिरहेको कोरोना सङ्क्रमणलाई नियन्त्रण गर्न केही सहज तथा सहयोग पुग्ने विश्वास लिइएको छ । जिल्लामा हालसम्म नौ हजार दुई सय ८० जनामा कोरोना सङ्क्रमण भएको छ।
1621421639-1730352532.jpg)
