देउखुरी । दाङमा कोरोना महामारीका कारण भएको क्षति तथा मनोसामाजिक असर कम गर्न जिल्लाको दुई पालिकाबाट खोप अभियान शतप्रतिशत पु¥याउन र मनोपरामर्शको काम गर्न थालिएकोे छ ।
स्वास्थ्य कार्यालयको समन्वय तथा नेपाल रेडक्रस सोसाइटी दाङको आयोजना भएको कोभिड–१९ पूर्वतयारी तथा प्रतिकार्य सञ्चालन परियोजनासम्बन्धी अभिमुखीकरण तथा समन्वयात्मक कार्यशालामा परियोजना प्रमुख राजकुमार क्षेत्रीले सबै नागरिकलाई शतप्रतिशत खोप लगाउन खोज र खोपको नीतिलाई पालिकासँगको सहकार्यमा अघि बढाइने बताए ।
‘कोभिडका कारण प्रभावित भएका परिवारलाई वैज्ञानिक मनोसामाजिक परामर्श गर्दै जीवनोपयोगी सीप सिकाउन अभियान महत्वपूर्ण हुनेछ’, उनले भने, ‘खोज र खोप नीति यहीभित्र पर्छ ।’ उनले मोबाइल क्याम्प राखेर भए पनि दुर्गम क्षेत्रका हरेक नागरिकलाई कोभिडबाट बचाउन खोप अभियान विकेन्द्रित गरेर लैजाने रणनीति रहेको बताए ।
जिल्लामा हालसम्म ८९ दशमलव पाँच प्रतिशतले मात्रै कोभिडविरुद्ध पूर्ण मात्रामा खोप लगाएका छन् । स्वास्थ्य कार्यालयको तथ्यांकअनुसार जिल्लामा हाल दुई मात्रै सक्रिय संक्रमित छन् । १३ हजार २ सय ३० संक्रमित भएकामा ३ सय ३७ जनाले ज्यान गुमाएका छन् । कार्यालय प्रमुख अंगदबहादुर शाहीले दुई पालिकाबाट थालनी गर्न लागिएको अभियानले कोभिड नियन्त्रण गर्नका लागि विशेष काम गर्ने हुँदा समस्या पहिचानका लागि सम्बन्धित ठाउँमा पुगेर सेवा दिन अपिल गरे ।
जिल्लाको भूगोलमा विविधता भएको हुँदा सहज सूचना तथा परामर्शसँगै खोपको पहुँच बढाउन लाग्नुपर्ने बताए । कार्यक्रममा प्रमुख जिल्ला अधिकारी हिरालाल रेग्मीले कोभिड विपद् मात्रै नभई एक कठिन सिकाइ भएकाले विगतको अभ्यासबाट पाठ सिक्दै योजनाबद्ध ढंगले मानवीय जोखिम कम गर्न र आर्थिक क्रियाकलाप चलायमान बनाइराख्ने नीति बताउन सचेत गराए । ‘कोभिड विपद् मात्रै होइन, यो एउटा गम्भीर मानवीय सिकाइ पनि भयो, पूर्वानुमानले सबै काम नगरेका बेलामा हाम्रा संयन्त्रले भ्याएसम्मको प्रयोग भयो’, उनले भने, ‘यसका लागि हामीले ठाउँअनुसारको परिवेशलाई ख्याल गरेर योजनबद्ध ढंगले अघि बढ्नुपर्छ ।’
1621421639-1730352532.jpg)
