काठमाडौं । औलोबाट हरेक वर्ष विश्वमा झण्डै ५० हजार मानिस प्रभावित हुने तथ्यांक सार्वजनिक भएको छ।
मलेरिया भनिने औलो रोगबारे जनचेतना फैलाउने उद्देश्यले हरेक वर्ष अप्रिल २५ तारिखका दिन विश्वभर विविध कार्यक्रम गरेर यो दिवस मनाउने गरिन्छ।
नेपालमा सन् १९८० को दशकमा महामारीको रुपमा रहेको औलो अहिले निवारण उन्मुख रहेको छ।
सन् २०१७ देखि औलोबाट हुने मृत्युलाई शून्य बनाउनुका साथै विगत दुई वर्षदेखि औलोका बिरामी एक हजारभन्दा कम संख्यामा झार्न सफल भएको स्वास्थ्य मन्त्रालयले जनाएको छ। नेपालले सन् २०२५ भित्रै औलो निवारण गर्ने गरी काम गरिरहेको छ।
अहिले कोरोना भाइरसको सङ्क्रमण फैलिरहेको अवस्थामा औलोको रोकथाम पनि गर्नु पर्ने चुनौती सरकारसामु देखिएको छ।
लामखुट्टेको टोकाइबाट औलो लाग्ने गर्दछ। औलो फैलाउने लामखुट्टे प्रायः फोहर तथा दूषित पानीमा बस्छ।औलोका कारण ज्यान गुमाउनेमा पाँच वर्षमुनिका बालबालिका धेरै छन् । बालबालिका, गर्भवती, सुत्केरी र रोग प्रतिरोधात्मक क्षमता कमजोर भएकाहरु औलोको जोखिममा रहेका विश्व स्वास्थ्य संगठनले जनाएको छ ।
बेस्सरी टाउको दुख्नु, वाकवाकी हुनु, वान्ता हुनु, हात–खुट्टा तथा जोर्नी दुख्नु, थकान तथा कमजोरी महसुस हुनु, शरीरमा रगतको कमी हुनु र ज्वरो आउनु औलोका लक्षण हुन्।
1621421639-1730352532.jpg)
