बागलुङ । बागलुङको निसीखोला गाउँपालिका–५ निसेलढोरकी नर्मता विकलाई बुधबार बिहानैदेखि सुत्केरी व्यथाले च्याप्यो। नजिकमा स्वास्थ्य संस्था थिएनन्।
व्यथाले च्यापेपछि आफन्तले स्वास्थ्यकर्मीलाई खबर गरे। निसीखोलादेखि स्वास्थ्यकर्मी जान सम्भवन थिएन। निसीखोलादेखि विकको घर निसेलढोर पुग्न झण्डै एक दिन लाग्छ।
आफन्तले ढोरपाटन नगरपालिका–९ स्थित ढोरपाटन सहरी स्वास्थ्य क्लिनिकमा खबर गरे। खबर पाउनासाथ क्लिनिकबाट अनमी सीता बुढा मगर विकको घर पुगिन्। उनको घर पुगेर स्वास्थ्य जाँच गर्दा बच्चाको धड्कन सुनिएको थिएन।
बच्चाको धड्कन नसुनिएपछि बुढामगरले विकलाई ठूलो अस्पताल लैजानुपर्ने सुझाइन्। भौगोलक विकटताका कारण यातायात सेवाको पहुँच छैन। नजिकमा अस्पताल नहुँदा बुढामगरले आफन्तलाई डोकोमा बोकेर विकलाई केही तलसम्म ल्याउन भन्दै आफैं गाडीको व्यवस्थापन गर्न ढोरपाटन फर्किइन्।
आफन्तले विकलाई डोकोमा बोकेर केही तल के झारेका थिए, उनले बाटोमै मृत बच्चा जन्माइन्। गाडी लिएर अनमी बुढामगर त्यहीँ आइपुगिन्। उनले नर्मताको बाटोमै सामान्य उपचार गरिन् र ढोरपाटन ल्याइन्।
‘उहाँलाई ९नर्मतालाई० बिहानदेखिनै गाह्रो भएको रहेछ। आफन्तले मलाई खबर गरेर घरमा पुग्दा उहाँ निकै छट्पटाउनुभएको थियो। जाँच गर्दा बच्चाको धड्कन सुनिएन’, अनमी बुढामगर भन्छिन्, ‘मैले बुर्तिवाङ अस्पताल लैजान सुझाएँ। मृत बच्चा जन्माउनुभयो। रगत धेरै बगिसकेको थियो। स्लाइन पानी दिएर ढोरपाटन ल्याएँ। अहिले त्यहीँ उपचार भइरहेको छ।’
नर्मताले ३२ हप्ताको समय नपुगेको बच्चा जन्माएको अनमी बुढामगरले बताइन्। ‘धन्न अस्पताल पुगेकाले बच्चा बचाउन नसके पनि आमाको ज्यान भने जोगियो’, अनमी बुढामगरले भनिन्। नर्मताले गर्भवती भएदेखि नै स्वास्थ्य परीक्षण नगराएको पाइएको उनले बताइन्।
बागलुङका दूरदराजमा अहिले पनि स्वास्थ्य तथा शिक्षाको सहज पहुँच छैन। त्यसले गर्दा यस्ता नियति दोहोरीरहन्छन्। विगतमा पनि यस्ता धेरै घटना यस क्षेत्रमा हुने गर्थे। ढोरपाटन नगरपालिकाका स्वास्थ्य संयोजक केशव थापा दुर्गममा यातायात सेवा तथा स्वास्थ्य संस्था अभावले यस्ता घटना हुने गरेको बताउँछन्।
ढोरपाटन नगरपालिकाले दुर्गम गाउँमा स्वास्थ्य संस्था स्थापना गरेर सहज स्वास्थ्य सेवाको व्यवस्था गरे पनि अशिक्षाका कारण महिला स्वास्थ्य परीक्षण गराउन नआउने उनको भनाइ छ।
ग्रामीण क्षेत्रमा गर्भवतीले स्वास्थ्य परीक्षण गराउने बानी न्यून भएको थापाले बताए। ‘कम्तीमा तीन पटक भिडियो एक्सेर गराउनुपर्ने हुन्छ। नर्मताले एकपटक पनि नगराएको पाइयो’, उनले भने।
समय समयमा बुर्तिवाङमा स्वास्थ्यकर्मी पठाएर निःशुल्क गर्भ परीक्षण गर्ने व्यवस्था मिलाए पनि धेरै नआएको पाइएको थापाले बताए। रासस
-1732856124.jpg)
1621421639-1730352532.jpg)
